የኢትዮጵያ ላኪዎች የዩኬን የቀረጥ ነፃ ዕድል እንዲጠቀሙ ጥሪ ቀረበ

የኢትዮጵያ ነጋዴዎችና ላኪዎች የዩናይትድ ኪንግደም (ዩኬ) ታዳጊ ሀገራትን ተጠቃሚ የሚያደርገውን የንግድ ሥርዓት በተሻለ ሁኔታ ተጠቅመው ወደ ዩኬ ገበያ የመግባት ዕድላቸውን እንዲያሰፉ ጥሪ ቀረበ።

ይህ ጥሪ በአዲስ አበባ በተካሄደው የሥልጠና መድረክ ላይ የተላለፈ ሲሆን፣ የኢትዮጵያ ላኪዎች የዕድሉን፣ የመስፈርቶቹንና የተግባራዊ ሂደቶቹን ግንዛቤ እንዲያሳድጉ ያለመ መሆኑ ተጠቁሟል።

በለንደን የኢትዮጵያ ኤምባሲ ከንግድና ቀጣናዊ ትስስር ሚኒስቴር፣ ከዩኬ የንግድና ልማት መሥሪያ ቤት፣ ከብሪታንያ ኤምባሲና ከኢትዮጵያ ንግድና ዘርፍ ማኅበራት ምክር ቤት ጋር በመተባበር ባዘጋጁት በዚህ መድረክ ላይ፣ የዩኬ ገበያ ለመግባት የሚያስፈልጉ የጥራት ደረጃዎችና የቁጥጥር መስፈርቶች ተብራርተዋል።

አምባሳደር ብሩክ መኮንን እንደገለጹት፣ ቡና፣ የግብርና ምርቶችና ጨርቃጨርቅ በዚህ ሥርዓት ተጠቃሚ ሊሆኑ የሚችሉ የወጪ ንግድ ዘርፎች ናቸው።

ሆኖም፣ የቀረጥ ቅናሹ ብቻውን በቂ ባለመሆኑ ላኪዎች ተወዳዳሪና ቀጣይነት ያለው ምርት ለማቅረብ ጥረት ማድረግ እንዳለባቸው አስገንዝበዋል።

የሥልጠናው ዓላማ የኢትዮጵያ ንግድ ተቋማት ወደ ዓለም አቀፍ የገበያ ሰንሰለቶች እንዲገቡና የወጪ ንግድ አፈጻጸማቸውን በማሳደግ ለኢኮኖሚ ዕድገት የድርሻቸውን እንዲወጡ ማገዝ ነዉ ተብሏል።

ብሪታንያ ከሁለት ዓመት በፊት ንግድ ከምስራቅ አፍሪካ ሀገራት ወደ ሀገሯ የሚገቡ የአበባ ምርቶች ከግብር ነጻ እንዲገቡ ፈቅዳ ነበር።

ውሳኔው የምስራቅ አፍሪካ ሀገራት አበባ አምራች እና ነጋዴዎችን ተጠቃሚ ከማድረጉ ባለፈ በብሪታንያ የአበባ ምርት በቅ አቅርቦት እንዲኖር ለማድረግ የታለመ እንደነበር በወቅቱ ተገልጿል።

ኢትዮጵያ፣ኬንያ፣ሩዋንዳ፣ ታንዛኒያ እና ኡጋንዳ ከምስራቅ አፍሪካ ሀገራት መካከል አበባ ላኪ ሀገራት ናቸው፡፡

እነዚህ አምስት የምስራቅ አፍሪካ ሀገራት በቀጥታም ይሁን በሶስተኛ ሀገር አድርገው ወደ ብሪታንያ ለሚያስገቡት የአበባ ምርት የገቢ ግብር እየከፈሉ አይደለም፡፡

ኢትዮጵያ በየዓመቱ ከ13 ሚሊዮን ፓውንድ በላይ ዋጋ ያላቸው የአበባ ምርቶችን ወደ ብሪታንያ በመላክ ላይ ትገኛለች፡፡

ከወጪ ንግድ የምታገኘውን ገቢ በማሳደግ ላይ የምትገኘው ኢትዮጵያ በዘንድሮው በጀት ዓመት ከወጪ ንግድ 11 ቢሊዮን ዶላር ገቢ ማግኘቷ ተገልጿል።

ቡና እና ማዕድናት ደግሞ የኢትዮጵያ ዋነኛ የወጪ ንግድ ድርሻን የያዙ ሲሆን ኤሌክትሪክ ሀይል፣ ጫት፣ ጥራጥሬ እና የቅባት እህሎች ተጨማሪ የገቢ ምንጮች ናቸው።