በአዲሱ የነዳጅ አቅርቦት መመሪያ መሰረት ቅድሚያ የሚሰጣቸው እነማን ናቸው?

የነዳጅ እና ኢነርጂ ባለሥልጣን በመካከለኛው ምስራቅ ያጋጠመውን ጦርነት ተከትሎ ዓለም አቀፍ ደረጃ የተከሰተውን የነዳጅ አቅርቦት መስተጓጎል ለመቋቋም በአገር ውስጥ የነዳጅ ስርጭት እና ግብይት ላይ ጥብቅ የቁጠባ እርምጃዎች እንዲወሰዱ የሚያዝ አዲስ መመሪያ አውጥቷል።

በመመሪያው መሠረት የነዳጅ አከፋፋይ ኩባንያዎች ለማንኛውም የነዳጅ ዓይነት አቅርቦት ቅድሚያ እንዲሰጡ ያላቸውን አካላት ይፋ አድርጓል።

በዚህም መሰረት ለፀጥታ ተቋማት፣ ቁልፍ ለሆኑ የመንግስት ፕሮጀክቶች እና በተለይም በመጠናቀቅ ላይ ላሉ የልማት ስራዎች ቅድሚያ እንዲሰጣቸው አዟል።

ለኢንዱስትሪዎች፣ መሠረታዊ ሸቀጦችን ለሚያመርቱ አምራች ድርጅቶች እና ምርታቸውን ወደ ውጭ ለሚልኩ ተቋማትም ቅድሚያ እንዲሰጣቸው ከተባሉ አካላት መካከል ናቸው።

እንዲሁም ከፍተኛ የኢኮኖሚ እንቅስቃሴ ለሚታይባቸው እና የሀገር አቋራጭ የትራንስፖርት ፍሰት ላለባቸው የኮሪደር አካባቢዎች እና ለሕዝብ ትራንስፖርት ተሽከርካሪዎች ቅድሚያ እንዲሰጡ የታዘዘ ሲሆን፣ ነዳጅ ቁጠባውን ለማጠናከርም አዲስ ክልከላ ተጥሏል።

በዚህም መሠረት ከፋብሪካው ከተገጠመላቸው የነዳጅ ማጠራቀሚያ (ሰልቫቲዮ) ውጭ፣ ተጨማሪ ሰልቫቲዮ አስገጥመው የሚመጡ አሽከርካሪዎችን ማደያዎች እንዳያስተናግዱ እና መሰል ድርጊቶችን ለፀጥታ አካላት እንዲጠቁሙ መመሪያ ተሰጥቷል።

በተጨማሪም ነዳጅ የጫኑ ቦቴዎች በተቀመጠላቸው የጊዜ ገደብ (Timing Arrival) መሠረት መድረሻ ቦታቸው መድረሳቸውን ኩባንያዎች በጥብቅ እንዲከታተሉ ታዟል።

በነዳጅ አጓጓዥ ተሽከርካሪዎች ብልሽት እና በሾፌሮች የልምድ ማነስ በሚፈጠሩ አደጋዎች በሚከሰት የነዳጅ ብክነት እንዳይፈጠር ትኩረት ሰጥተው እንዲሰሩ ለነዳጅ አከፋፋይ ኩባንያዎች ማሳሰቢያ ተሰጥቷል።

በነዳጅ ቸርቻሪ ማደያዎች በኩልም በከተማ አስተዳደር በክልል /ንግድ ቢሮዎች፣ በዞን/ በከተማ/ እና በወረዳ ንግድ ቢሮ/ ጽህፈት ቤት በኩል በደብዳቤ ለሚስተናገዱ ቀጥታ ተጠቃሚዎች የሚሰጠው ነዳጅ በጥንቃቄ እና ለታለመለት ዓላማ ብቻ መዋል እንዳለበት መመሪያው አሳስቧል።

ባለሥልጣኑ በመጨረሻም ይህንን መመሪያ ተግባራዊ በማያደርጉ እና በነዳጅ ግብይት ሂደት ላይ ሕገ-ወጥ ተግባር በሚፈጽሙ ማንኛውም ተዋናዮች ላይ በአዋጅ እና በመመሪያው መሠረት ጠንካራ እርምጃ እንደሚወሰድ እና ተጠያቂ እንደሚሆኑ በጥብቅ አስጠንቅቋል።