የማራቶን ባለ ሪከርዷ አትሌት ትግስት አሰፋ ለዓለም ምርጥ የዓመቱ አትሌቶች ሽልማት የመጨረሻውን ዙር ተቀላቀለች

አትሌት ትግስት አሰፋ ለአለም አትሌቲክስ በዓለም ምርጥ የዓመቱ አትሌቶች ዝርዝር ውስጥ ከተካተቱ ምርጥ 10 የዓለም አትሌቶች መካከል አንዷነበረች።

የዓለም አትሌቲክስ ፌዴሬሽን በ2023 ዓመት በተካሄዱ የተለያዩ ውድድሮች ላይ ስኬታማ የሆኑ አትሌቶችን ዝርዝር ይፋ ማድረጉ ይታወሳል።

በመጀመሪያው ዙር 11 ምርጥ የዓለማችን አትሌቶች ዝረዝር ውስጥም የ5 ሺህ ሜትር ባለ ሪከርዷ ጉዳፍ ጸጋዬ እና የማራቶን ባለሪከርዷ አትሌት ትግስት አሰፋ በዝርዝሩ ውስጥ የተካተቱ አትሌቶች ነበሩ።

ዎርልድ አትሌቲክስ ይፋ ባደረገው መረጃ መሰረት በውድድሩ ለመጨረሻ ዙር ያለፉ አትሌቶችን ዝርዝር አውጥቷል።

በዚህም የማራቶን ባለሪከርዷ ኢትዮጵያዊቷ አትሌት ትግስት አሰፋ ለመጨረሻ ዙር ውድድር ከቀረቡ አትሌቶች መካከል እንዷ ሆናለች።

ከአትሌት ትግስት አሰፋ በተጨማሪ ኬንያዊቷ አትሌት ፋይዝ ኪፕዬጎን፣ ጃማይካዊቷ ሸሪካ ጃክሰን፣ የኔዘርላንዷ የ400 ሜትር ተወዳዳሪ ፌምኬ ቦል እንዲሁም ቬንዙዌላዊቷ የርቀት ዘላይ ዩሊማር ሮጃስ ለመጨረሻ ዙር በእጩነተ ከቀረቡ አምስት አትሌቶች መካከል ተጠቅሰዋል።

ከዚህ በተጨማሪም አትሌት ለተሰንበት ግደይም ለአለም አትሌቲክስ “የስፖርታዊ ጨዋነት” ሽልማት ከመጨረሻ ሶስት ዕጩዎች አንዷ መሆኗ ይታወሳል፡፡

ከወራት በፊት በሃንጋሪ ቡዳፔስት በተካሄደው የዓለም አትሌቲክስ ቻምፒዮ በ10ሺ ሜትር የሴቶች ሩጫ የብር ሜዳሊያ ያጠለቀችው አትሌት ለተሰንበት ግደይ ያሳየችው በውድድሩ ላይ የወደቀችውን አትሌት ሲፋን ሀሰንን ወደኋላ በመመለስ በማቀፍ ባሳየችው ስፖርታዊ ጨዋነት ለሽልማት ታጭታለች።

የመጨረሻ አሸናፊ ምርጥ የዓመቱ ሴት እና ወንድ አትሌቶች ምርጫ ደግሞ ከታህሳስ 2-3 ቀን 2016 ዓም ይፋ ይደረጋል ተብሏል።